Ci dit del lu e de l’aignel,
ki beveient a un clincel.
Li lus en la surse beveit
e li aignels aval esteit ;
iriement parla li lus,
que mut esteit cuntrarïus ;
par maltalent parla a lui :
« Tu me fes », dist il, « grant ennui. »
Li aignel[ez] ad respundu :
« Sire, de quei ? » — « Dun ne veiz tu ?
Tu m’as cest’ ewe si trublee
n’en puis beivre ma saülee ;
arere m’en irai, ceo crei,
cum jeo vienc ça, murant de sei. »
Li aignelez dunc li respunt :
« Sire, ja bevez vus amunt,
de vus me vient ceo que ai beü. »
« Quei ! », feit li lus, « maudiz me tu ? »
Cil li ad dit : « N’en ai voleir. »
Li lus respunt : « Jeo en sai le veir.
Cest me[i]mes me fist tun pere
a ceste surse, u od lui ere,
ore ad sis meis, si cum jeo crei. »
« Que retez vus ceo », fet il, « a mei ?
Ne fu pas nez dunc, si cum jeo quit. »
« E ke pur ceo ? » li lus ad dit.
« Ja me fez tu ore cuntrere
e chose que ne deussez fere. »
Dunc prist li lus l’aignel petit,
as denz l’estrangle, si l’ocit.
Issi funt li riche seignur,
li vescunte e li jugeür
de ceus qu’il unt en lur justise ;
faus’ acheisuns par coveitise
treovent asez pur eux cunfundre :
suvent les funt a pleit somundre,
la char lur tolent e la pel,
si cum li lus fist a l’aignel.
