Issi avient que un cerf beveit
a une ewe, kar sei aveit ;
guarda dedenz, ses cornes vit.
A sei me[is]mes ad dunc dit
que nul beste le cuntrevaleit
ne si beles cornes n’aveit.
Tant entendi a sei loër
e a ses cornes esgarder
qu[e]’il vit chiens venir curant
e lur mestre aprés cornant.
Aprés lui vienent, sil quereient
pur ce que prendre le voleient.
El bois se met tut esmaiét,
par ses cornes est atachiét,
en un buissun est retenuz.
Dunc sunt li chien a lui venuz.
Quant il les vit si aprismer,
si se cumence a desreiner :
« Veirs est », fet il, « que vileins dit
par essemplë e par respit :
li plusur veulent ceo loër
qu’il devreient suvent blamer,
e blamer ceo que il devreient
forment loër s’il [le] saveient. »
