Un prestre volst jadis aprendre
a un lu lettres fere entendre.
« A », dist li prestre, « a », dist li lus,
que mut ert fel e enginnus :
« B », dist le prestre, « di od mei ! »
« B », dist li lus, [e] jo l’otrei. »
« C », dist le prestre, « di avant ! »
« C », dist li lus, « a i dunc itant ? »
Respunt le prestre : « Ore di par tei ! »
Li lus li dist : « Jeo ne sai quei. »
— « Di que te semble, si espel ! »
Respunt li lus, il dit : « Aignel ! »
Le prestre dit que verité tuche :
tel en pensé, tel en la buche.
Le plus [de ceus] dit hum suvent :
cel dunt il pensent durement,
e par lur buche est cuneü,
ainceis que seit d’autre sceü ;
la buche mustre le penser,
tut deive ele dë el parler.