Ci nus recunte d’un corbel
quë enseignot un suen oisel
qu’il ne deüst nul humme atendre
quil vousist encumbrer e prendre ;
s’il humme veïst baisser vers tere,
prendre bastun u piere quere,
dunc s’en deüst aillurs voler,
que cil nel poïst encumbrer.
« Si jeo nel vei », fet il, « beisser
n[e]’en ses meins rien manïer,
[me] dei jeo dunc[es] remüer ? »
Li corps respunt : « Laisse m’ester !
Vole par tei, si te haïe !
Ore sui sanz dute de ta vie ;
a mes autres oiseus irai,
a mun poeir lur aiderai. »
Par cest essample nus dit tant :
quant hum ad nurri sun enfant,
qu’il le veit sagë e veizié,
le queor [en] ad joius e lié ;
a sun cunseil le deit leisser
e puis les autres avancer.